Translate

Saturday, May 5, 2012

نهاية الحرب وانتصارى على حب الشباب


انا النهاردة هحكيلم تجربتي المريرة مع حب الشباب


الغريبة ان حب الشباب ابتدى يظهرلي من اول مادخلت الكلية...يعني وانا عندي 17 سنة او 18 مش فاكرة...وقبل كده كان وشي صافي اوي..(ماتستغربوش انا آخر سنّة غيرتها كانت ناب وكنت فأولى ثانوي اه والله!)

المهم نخش في المفيد...انا جربت غساسيل كتير (جمع غسول) وكريمات بالعبييييييط وكان وشي ده حقل تجارب محترم...ياما قشرته وياما حرقته ويامااااا





ملحوظه هامه









يجب استشاره الطبيب قبل استخدامك اى كريمات طبيه




في الاخر الحمد لله بعد مالفيت على كل أدوية حب الشباب اللي في مصر...جربت كريم اسمه





Skinoren



مستورد وألماني تقريبا..علبته برتقاني فأبيض وبحوالي 35 جنيه...يمكن ناس تقول غالي شوية بس انا كان بيطلعلي حبوب فخدودي بس ..فكان الكريم بيقعد معايا كتير اويييييي...كمان يابنات الكريم بجد بيفتح البشرة جدا وهتلاحظيها من اول استعمال و بيشيل الجلد الميت وهيخلي بشرتك ناعمة أوي...ولازم تصبري شوية عليه ماتزهقيش بسرعة لان اي كريم بياقد وقت على مالنتايج تبان على الأقل شهر او اتنين

يعني الكريم بيعالج الحبوب وبيمنع ظهورها تاني...وبيفتح وبينعم (ناقص يغسل ويطبخ)



المهم الروتين بتاعي كان كالآتي

كنت بغسل وشي مرتين في اليوم (بغسول ناعم وخفيف وياريت يكون من غير ريحة...نصيحة للبنات اللي بتعاني من حب الشباب...ابعدي عن الصابون وعن الغسول اللي بريحة قوية كل ده بيلهب بشرتك وينشفها اكتر...ولما تنشفيها اكتر الغدد الدهنية اللي فبشرتك هتحس ان البشرة ناشفة وبالتالي هتطلع دهون اكتر والحبوب تزيد اكتر...حد فاهم حاجة؟

لا بجد الكلام ده علمي وانا قريت كتيييييير اوي في الموضوع ده



المهم بعد الغسول كنت بدهن الكريم مرة الصبح ومرة بالليل...خلي بالكو بيحرق شوية بس بعد عشر دقايق الحرقان بيروح...ومع الوقت بطل يحرق خالص



كمان في حاجة جميلة اوي اكتشفتها...لو عندك حباية حمرا كبيرة وعايزاها تروح بسرعة...هاتي قطنة ودان ...واغمسيها في مية أكسجين (لونا او بايوبوينت) وادهنيها على الحباية...وانا عجبني بايوبوينت اكتر لانه تقيل شوية عامل زي المستحلب كده و بيقعد فترة اكبر على الحباية...بجد والله عن تجربة هتلاقي الحباية تاني يوم خفت اويييييي ويمكن كمان تختفي خالص وكررري الكلام ده لحد ماتروح خالص (بس مش اكتر من مرتين في اليوم عشان ماتلتهبش)



الاكسجين اللي في مية الاكسجين بيموت البكتيريا بتاع الحبوب لانها بكتيريا لا هوائية anaerobic bacteria



من الآآآخر كده هلخصلكو الحوار عشان يبقى متجمع

1- بغسل بغسول خفيف كل يوم مرتين مرة لما اقوم الصبح ومرة قبل ماأنام



2- بدهن سكينورين بعد كل غسلة كويس لحد مااحس انه اختفى أو البشرة شربته بمعنى أصح (وماتدهنيش كتير يعني شوية كريم بحجم حبة الفول السوداني تكفي وشك كله)



3- أجيب قطنة ودان...واحطها في مية الأكسجين وادهنها على الحبوب المحمرة اللي عايزاها تمشي بسرعة



4- لو لقيتي بشرتك بتنشف ياريت تحطي كريم يرطب بشرتك وفنفس الوقت ميكونش دهني...انا كنت بستعمل لوشن جونسون للاطفال اللي لونه بينك...والله تحفة وبيخلي بالبشرة حريم ومش دهني خالص واحسن بكتير من كريمات تانية جربتها كانت اضعاف أضعاف السعر

بس كده



والله يابنات فعلا وشي اتغير اوي بعد سكينورين ده وبجد ندمت اوي على كل الفلوس اللي ضيعتها على الحاجات التانية اللي حرقت وشي ...فعلا بطل يطلعلي حبوب خالص وشي بقى صافي جدا جدا ماشاء الله





ملحوظة صغيرة:

االحبوب بتاعتي كانت بتبقى كده زي تجمعات دهون تحت الجلد...زي فسافيس كده بارزة وبحس ان جواها دهون...ومع الوقت بتتحول لحبوب حمرا...الكريم نضف كل الكلام ده...يارب تكونو فهمتو قصدي



كمان حاجة صغيرة انا عارفه انكو زهقتو دي آخر حاجة

بجد يابنات بطلو تصرفو فلوسكو على مزيل المكياج (خصوصا مزيل مكياج العيون لان أغلبهم بيبقى غالي اوي لو هتجيبي حاجة نضيفة)....أحلى حاجة جربتها كمزيل مكياج وتحفة بجد ومابيحرقش العيون خااااالص حتى لو دخل فعنيكي تخيلو ايه؟؟؟



شامبو جونسون للأطفال!!!!....تحفة بمعنى الكلمة...اغسلي بيه وشك عادي كانك بتغسلي بغسول ورغيه فايدك وافركي بيه عيونك بالرااااااااحة ورموشك بالراحة عشان ماتوقعيهوش

وهتلاقي كل الكحل والماسكرا راااااح وكريم الاساس وكله تحفه بجد...ومابيحرقش العنين خالص روعة من هنا لبكرة الصبح...ده غير انه مش غالي خالص واصغر ازازة هتقعد معاكي كتييييير

ولو مش مصدقيني اكتبو فجوجل Johnson's baby shampoo make up remover واقرو تجارب الناس في الموضوع ده

انا خلصت خلااص اهو عشان ماتضربونيش ويارب تستفيدو من التجربة واللي هتجرب الكريم ونفع معاها ياريت تحكيلنا...وتدعيلي...واللي مش هينفع معاها ماتدعيش عليا...كل واحد بشرته مختلفة عن التاني





No comments:

Post a Comment