لشعر ناعم من غير هيشان

المرحلة الأولى :

1- لو شعرك خفيف و ضعيف ابعدي تماما عن الألوان الفاتحة

يعني يا فتوكات ما ينفعش واحدة يبقى شعرها خفيف و مقصف و حالته صعبة و نفسها تعمله أشقر مثلا و هايلايت انت كدا بتبني الضعف اللي في شعرك

لان كقاعدة عامة اللون الفاتح بيبين أي حاجة و اللون الغامق بيخفي أي حاجة


طيب شعرنا مجهد و خايفين نصبغه

هقولك على أأمن صبغة في الدنيا ممكن تعمليها انا من كام يوم كنت بكلم خطيبي ع الموبايل و سبت الصبغة على شعري لمدة ساعة و يمكن أكتر قولت خلاص كدا انتهي لكن الحمد لله محصلش أي مشكلة لأني بستخدم أأمن حاجة ممكن تحطيها على شعرك


LOREAL CASTING CREME

قولنا هنستخدم ألوان غامقة

الأفضل على الاطلاق لونين black cherry و دا اسود بيدي ضوء لون التوت



plum اسود بيدي ضوء لون العنب انا لسة عاملاه تحفة فنية ماشاء الله



انا مجربة اللونين و الاتنين حكاية

ميزة الصبغة دي انها خالية من الأمونيا و بتنعم الشعر جدا و حاطين جواها حمام كيم بروتين بعشقه : ) نفسي أعرف بيعملوه ازاي نعومة محصلتش

خالوا بالكم لوريال نوعين نوع اسمه excellence و دا فيه أمونيا بس مزودين فيه كيراتين و الأمونيا عشان تثبت اللون

ما انصحش بأي حاجة فيها أمونيا نهائي للشعر و لو حتى شعرك سليم خاليكي طبيعية بألوان طبيعية

و احنا لعبنا كله ع ال creme لأنها خالية من الأمونيا و ألوانها كتير على فكرة بس نقي الغامق في مرحلة علاج شعرك عشان لما تحسي بنتيجة في فترة قصيرة هترتاحي نفسيا لأن معظم مشاكل الشعر ان نفسيتك تعبانة و الموضوع شاغلك : )

ملحوظة مهمة : ال creme ما بتقعدش ع الشعر كتير تقريبا شهر بس شعرك هيغمق يعني اللون الاسود هيفضل موجود اللون الاكسترا زي الأحمر أو الفيوليت هيمشي تقريبا دا لو شعرك غامق لكن لو شعرك مصبوغ لون فاتح من الأول هيحصل العكس الفيوليت أو الأحمر هيكون موجود بدرجة خفيفة و الاسود هيفتح شوية بس


المرحلة التانية :

لا غني عن أقراص الفيتامينات معظمنا عايش ع الدايت بيأثر طبعا على الشعر لأن طبيعي حارمة نفسك من حاجات كتير

أهم حاجتين للشعر الحديد و الفوليك أسيد و الزينك

دوري على أي فيتامين يكون فيه ال 3 حاجات دول لأن دا الأساس لشعرك

انا بستخدم
centrum دا فيه كل العناصر الغذائية اللي جسمك هيحتاجها و ممكن تقع من الريجيم !



المرحلة التالتة :

لو عندك قدرة مادية انك تعملي كيراتين أو بروتين اعمليه

لو ما عندكيش تستخدمي المستحضرات اللي فيها كيراتين

بلا شك افضلهم gliss الأسود لان في كميات كبيرة من الكيراتين

الشامبو لوحده ممكن ينشف الشعر

لكن الشامبو مع الكونديشنير الاسود بينعم الشعر جدا جدا جدا ماشاء الله

أدي صورهم



المرحلة الرابعة :

أمبولات الشعر



طبعا البانثينول ماركات كتيييييييييييييييير كلمي أي صيدليه و قوليله عايزة لوشيون أو أمبولات البانثينول

بيطول الشعر البانثينول بس خالي بالك

اللوشن بينشف الشعر شوية و هقولك على تكة تعمليها عشان شعرك ما ينشفش الأمبولات لا مش بتنشف الشعر بعد كل شاور تكسري أمبول على شعرك و تدلكي فروة راسك كويس

بعد الدش لأن المسام بتاع فروة راسك هيكون مفتوح فهيشرب البانثينول

لو عندك اللوشن مش هنحطه على شعرنا مباشر لأنه بينشف الشعر احنا هنحطه على ماسك الشعر اللي هنشرحه بالتفصيل كمان شوية عشان شعرك ما ينشفش و تضايقي

ماركات مجربه :

Alovera أو Aloeva


المرحلة الخامسة :

ماسكات الشعر

انا بعمل زيت الزيتون بالتوم

مهما اتكلمت عليه حكاااااااااااااية

التوم بيطول الشعر و زيت الزيتون بينعم الشعر جدا جدا جدا للصبح طبعا قولنا لو عايزة تستخدمي بانثينول رشي من اللوشن في الماسك أو اكسري الأمبول ع الماسك

طريقة الماسك :




هتدقي التوم عادي و تضيفي عليه زيت الزيتون بعدين حطيهم في الخلاط و نقطتين ماية ما تزوديش في الماية و اضربيهم ضربا مبرحا

احنا بنعمل كدا عشان ماية التوم هي الأساس بنطلع الخلاصة من التوم و ادهني جذور شعرك للأطراف

هتبلي فوطة بماية سخنة و ليه ماية سخنه عشان نفتح مسام فروة راسك و بالتالي تستفيدي من زيت الزيتون و التوم

هتسبيها على شعرك ساعتين و تغسلي شعرك كويس بشامبو و كونديشنر جليس

لو الريحة لسة موجودة دوبي نسكافيه بلاك أو قهوة في ماية و اغسلي بيهم شعرك


المرحلة السادسة :

طريقة تصفيف الشعر مهمة جدا

نصيحتي لأي فتوكة انها ما تسرحش شعرها و هي مبلول أبدا زي ما اتفقنا المسام مفتوح فسهل الشعر يقع و انتي بتسرحيه طيب نعمل ايه لما ناخد شاور

سرحي شعرك قبل الشاور و هو ناشف و كدا كدا بعد الكونديشنر هيفك أي تشابك ممكن يحصل و انتي بتغسلي شعرك

الموضوع دا مهم أوي

المرحلة السابعة :

علاجات أخرى

خطيبي كان جايبلي - ربنا يكرمه يا رب - أمبولات ginsing للشعر انا لسة بدأت أجربها

الجنسنج دا مركب اكتشفوا انه بيطول الشعر و ليه فوايد كتير أوي ع الجسم ممكن تعملي بحث ع النت انا جربتها لما حطيتها على شعري حسيت بتنميله كدا في فروة راسي فعرفت انها شغالة ع العموم بعد فترة لو لقيتها حلوة و فعالة هعمل موضوع منفصل عنها ان شاء الله


المرحلة التامنة

و دي أهم مرحلة و أكثرهم فاعلية و تأثيرا على شعرك

طلعي صدقة بنية شفاء شعرك و هتشوفي ان شاء الله خير كبيييييييييييييييييييييير في شعرك و الدعاء طبعا انه يطول و يبقى تمام و ربنا يتقبل

و يا رب كلنا شعرنا يطول بصحة

يا رب الموضوع يكون مفيد و يعجبكم


منقوووووووول للفائدة